"ஜமுனாபாரி' ஆடு வளர்ப்பில் மதுரை விவசாயிகள் ஆர்வமாக உள்ளனர். 80 கிலோ எடையுள்ள ஆட்டின் அதிகபட்ச விலை 50 ஆயிரம் ரூபாய் வரை விற்கப்படுகிறது.பாகிஸ்தானை பூர்வீகமாக கொண்ட ஜமுனாபாரி ஆட்டின் காதின் நீளம் ஒரு அடி; அகலம் 10 இஞ்ச். பார்ப்பதற்கு அழகாக இருக்கும். ஆண் ஆடுகள் ஐந்தடி உயரமும், பெண் ஆடுகள் நான்கடி உயரமும் வளரக்கூடியது.
வளர்ந்த ஆட்டின் குறைந்தபட்ச எடை 80 கிலோ வரை அதிகரிக்கும். ஆட்டின் கறி, மிருதுவாகவும், அதிக சுவையுடன் இருப்பதால் மாமிச பிரியர்களுக்கு ஜமுனாபாரி வரப்பிரசாதமாக கருதப்படுகிறது.
ஜமுனா பிரியாணி: முன்னணி அசைவ உணவகங்களில் வான்கோழி பிரியாணிக்கு தனி மவுசு உள்ளது. இவ்வரிசையில் ஜமுனாபாரியும் இடம் பிடித்துள்ளது. ஒரு கிலோ தனிக்கறி 500 ரூபாய் வரை விற்கப்படுகிறது. கறியை விலைக்கு வாங்குவதை விட ஆட்டுக்குட்டிகளை விவசாயிகளிடம் கொடுத்து வளர்த்தால், ஆட்டின் உரிமையாளருக்கு அதிக லாபம் கிடைக்கிறது. மதுரையில் அலங்காநல்லூர், பாலமேடு பகுதியில் இவ்வகை ஆடு வளர்ப்பில் விவசாயிகள் அதிக ஆர்வம் காட்டி வருகின்றனர். இவர்கள் சுயமாகவும், கூலிக்கும் ஆடுகளை வளர்த்து வருகின்றனர். இதில் அவர்களுக்கு நல்ல லாபம் கிடைக்கிறது.ஏற்றுமதிக்கு உகந்தது: ஜப்பான், சிங்கப்பூர், மலேசியா, ஹாங்காங், தைவான் மற்றும் அரேபிய நாடுகளுக்கு பதப்படுத்தப்பட்ட கறி ஏற்றுமதி செய்யப்படுகிறது.